يوميات عمل البحث المشئوم
ـــــــــــــــــــــــــــــــــــــــــــــــــ
أحيانا تحدث للإنسان أشياء غربية وإن كان يعتبرها البعض كوارث أو أشياء تدعو للشؤم ويصفها الآخرون بالنحس وتتكرر تلك الأشياء لا أعرف إذا كانت مجرد صدفة أو شئ يدعو إلى التأمل ,,,,,,, عندما كلفت بعمل بحث ....... لا اعرف كيف أصف ذلك الشعور الذى أصابنى !!!
لا حماس لا جدية وخنقة كبيرة جدا كل ما أفكر أعمل البحث قلت لنفسي عادى ضغط الشغل اللى بتكلف بيه هو السبب بس المشكلة انى لما بدأت فى البحث الجهاز اتعطل وبعد معاناه فى تصليحة ملفات كتير ضاعت قلت مش مشكلة عادى وبتحصل كتير .........
عملت كمية كبيرة فى البحث بس للأسف النور قطع من غير ما أحفظ وضاع شغلى قلت مش مشكلة عادى وبتحصل .........
عملت البحث التانى وكل صفحة اعمل حفظ لحد ما جبت أخرى فية وقلت كدة خلاص جبت أخري ........
الحمد لله البحث اتعمل ع خير تعالوا بقى نشوف الطباعه أخر ميعاد لتسليمة النهاردة وأنا خلصتة امبارح بس النور كان قاطع فمعرفتش أطبع فى المكان اللى أنا فية ولا حتى أبعت الملف للأستاذ رضا ع النت يطبعهولى قلت عادى مش مشكلة بتحصل كتير ........
روحت النهاردة طنطا وطلبت من صحبتى تيجي معايا علشان اطبع وأقدم البحث المركز اللى كنت متعودة عليه روحته لقيته مش موجود واتفتح مكانه شركة جديدة قلت عادى مش مشكلة وبتحصل .................
روحت أطبع فى الكلية كان زحمه شوية بس مش مشكلة المهم اطبع لما جة دورى فى الطبع 17 ورقة والطبعه وقفت ويقولى الدكتور الورق خلص من الطابعه ومفيش ورق غيرة قلت عادى مش مشكلة وبتحصل ...
قعدو يدوروا على ورق لحد ما لقوا والحمد لله بس الطبعه غريبة تطبع ورقتين وتقف ورقتين وتقف وهكذا لحد ما وصلت ل 29 ورقة ووقفت خالص طبعا هتسألونى عن السبب .. الحبر خلص بس مفيش غيرة هى دى مشكلة بس هعديها واقول بتحصل ............
الدكتور أمير ربنا يكرمه حاول يطبعلى فى طابعة تانية لكن للأسف مش راضية تشتغل أخذت حاجتى وماشية لقيت الطابعه اشتغلت وطبع لناس تانية التفائل كويس فى أمل انى اطبع هاااااااااااااااااا قد طبعت أبشرووووووووووووا........يلا نصور البحث ونكعبة
المكان اللى بيكعب مقفول ودورنا ع غيرة لحد ما لقيت بس معرفش مين الغلس بقة اللى كان بيعاكس البنت اللى بتصورلى الورق فى التليفون معلش عادى وبتحصل بس للاسف مكنه التصوير بايظة ومعرفتش اصور مش مهم المهم أطبع عاوزة أقدم البحث ميعاد المحاضرة يا ناس نسيت أقولكم ان صاحبتى صندلها اتقطع والوضع بقى متأزم بس عادى وبتحصل........
يلا يا استاذة كعبيلى الورق قالتلى مبعرفش اكعب لما محمد يجي يكعبلك واستنيت لما محمد جة وإطمنوا كعبت هو اينعم الورق مش متظبط بس كعبت الحمد لله بس ملقناش المقص نقص الزيادات فى التكعيب عادى وبتحصل .............
قلت صاحبتى نشوف مشكلتها ونخيط الصندل بعد ما لقينا المكان واخدت المقص منهم وقطعت الزيادات والراجل قعد يزعقلى ويقولى بتعطلينى مش مشكلة المهم ان خلصت البحث وقدمته فى ميعادة عادى وبتحصل !!!
تحية خاصة لصحبتى صاحبة الصندل المقطوع قبل ما يتخيط صاحبتى
