لما ببوح
بيقولوا قبيح
بيقولوا عنى واحد متهور
مابيفهمشى فى التلميح
طب اعمل ايه؟
انا مخلوق بطبيعتى صريح
كل العالم عندى ف كفة
وبلدى ف كفة
انا بالفعل بحبها موت
مش (كداب زفة)
بس لا قلتانا راجل سوبر
ولا بكتب غنوة فى اكتوبر
ما الناس واعيه وفاهمه وعارفه
انا واحد م الكام مليون
اللى سعيدهم....... بقى مطحون
واللى حزينهم احلى زبون
للتليفزيـــــــــــون
يستضيفوه فى برامج آه
و يدولوا الجايزة المحترمة
بعد ما بيفرجوا على أهله
أمـــــــــــة لا اله الا الــله
بعد الجايزة يجرى يزقطط
م الفرحه يا عينى بيعيط
وعياله وراه من فرحتهم
عماله تجرى وتتنطط
كل ده بقى يتصور فيديو
وسلو موشن مع أغنية
كده احبابنا هديو ورضيوا
بعدها ييجى الأخ مذيع
ابو شعر مسبسب لميع
عينه بتبرق م التدمـــــيع
يشكر سيدنا رئيس الدولة
وياخد بين الخرابات جولة
يعرض لينا مآسى الخلق
واحنا نخبط كف بكف
( 2)
ونقول ولا قوة ولا حوله
بقى بالذمه
دا اسمه كلام
تسرق واحد سرقه تمام
واما يجوع ويفرفر تجرى
تديله صدقه..... بجد حرام
قلة ادب السادة..... ريادة
وأباحتهم..... ترانيم فى عبادة
واما اتكلم انا ياخدونـــــــــــى
اسألهم على فين يااخوانا
يقولولى هاتشربها ساده
تهمتى ايه ؟؟؟ من غير تجريح
بشياكه يقولولى .....قبيح
طب هااتعلم أبقى مؤدب
يجاوبنى الأخ على المكتب
انت قبيح وقليل الذوق
ماتفكر قبل ماتتكلم
انت حمار ولا دى غباوة؟؟
قلتله لأ أنا كده مخلوق
........
لما نزلت مشيت فى الشارع
كنت ببحلق ماشى بتابع
شفت حمير وبجد كتير
شفت تلاته ماشيين قدامى
وانا ف الشارع كنت الرابع
كان الآول ساحب كارو
ولا عارف بحره من برو
ماشى بيلعن أبو راكبينه
آه بيلعنهم...... بس ف سره
اما التانى فكان متفائل
حمله تقيل...... بس حمار عاقل
ماشى على جنب ... ومالوش ذنب
لا بيسأل ..... ولا يوم يتسائل
أما التالت كان بلا افيه
حمار غلبان معدوم العافيه
ولا بقى همه كلام وسكوت
(3)
ولا بقى همه يعيش مبسوط
ويفرح قوى لو يومه يفوت
حلمه يادوبك يلقى القوت
وانا للأسف انا كنت الرابع
فجأة لقيتنى ماشى طابور
بيقولوا عنى..... حمار مغرور
بس البيه الظابط قاللى
انت يا جحش عليك الدور
كل شوية عامللى حوادث
عود نفسك تسكت خالص
ولااتكلم.... وانا اوريلك
قلتله لأ.... أنا بقى مش ناقص
انا هاامشى خلاص جنب الحيط
وامشى على دماغى لو حبـــــيت
ممكــــــــن انز ل نــــــعى لنفسى
واكتب (مات)..... على باب البيت
(كتبت عام2007)
